Официјално: Од Фенербахче на позајмица во МЗТ Скопје Аеродром! (ФОТО)

Еден од најталентирани европски кошаркари во својата генерација, Бугаринот Јордан Минчев (19 год, 203 см.), од денеска е нов член на МЗТ Скопје Аеродром и тоа на едногодишен заем од таборот на европскиот шампион Фенербахче.

Станува збор за кошаркар кој игра на позициите бек-шутер и ниско крило и кој лани потпиша шестгодишен договор со тимот од Истанбул како една од идните ѕвезди на турскиот гигант. Своето професионално деби го имаше во софиски Левски во сезоната 2014/15 и зад себе има пет настапи во АБА-лигата, 27 средби во првенството на Бугарија и 14 натпревари во Балканската лига (БИБЛ).

Во февруари годинава беше позајмен на српскиот тим Вршац. Минчев е и актуелен бугарски репрезентативец. Ангажманот на Минчев е плод на добрата соработка на МЗТ Скопје Аеродром со челните луѓе на Фенербахче, која би требало и да се засили во периодот кој претстои.

Тој е веќе во Скопје, ќе биде дел од експедицијата која утре ќе замине за Белград на задутрешниот меч против ФМП, но дебито во „сино-белиот“ дрес ќе го има следниот понеделник во мечот од 3. коло од АБА-лигата на домашен терен против хрватскиот клуб Задар.

Фото: mztskopjeaerodrom.mk